د صادراتي سندونو د طی مراحل کېدو مرکز جوړېدو هوکړه لیک لاسلیک شو
دوشنبه مورخ ۲۲ شعبان المعظم ۱۴۴۵/ ۱۴ کب ۱۴۰۲
د صادراتي سندونو د طی مراحل کېدو د واحد مرکز هوکړه لیک د اړوندو ادارو معینانو په شتون کې له صنعت او سوداګرۍ وزارت اود افغانستان د سوداګرۍ او پانګونې خونې سره لاسلیک شو.
په یاده غونډه کې د چارو ادارې لوی ریاست مرستيال مولوي عبدالولي حقاني وویل: اړتیا ده چې د افغانستان اسلامي امارت په چوکاټ کې راسپارل شوې دندې په صداقت او اخلاص سره پای ته ورسوو. هغه زیاته کړه چې تر دې وړاندې زمونږ سوداګر له ډېرو ستونزو سره مخ وو او د داسې مراکزو له جوړېدو سره به دوی ته ډېرې اسانتیاوې برابرې شي.
د صنعت او سوداګرۍ وزارت مرستیال ښاغلي قدرت الله جمال د سندونو د طی مراحل کېدو واحد مرکز جوړېدل ګټور وبلل او زیاته یې کړه چې د دې مرکز په جوړېدو سره به سوداګرو ته ډېرې اسانتیاوې برابرې شي .
دیادونې وړ ده چې د صنعت او سوداګرۍ وزارت د صادراتو د اسنادو په پړاوونو کې د امکان تر حده د اسانتیاوو د برابرولو، د صادراتو په لاره کې د خنډونو د لیرې کولو او د واحد چتر لاندې د هېواد د صادراتي توکو د اسنادو د پروسې او ساده کولو په مووخه؛ د هېواد په ۸ زونونو کې د سندونو د صادرولو د پړاوونو د واحدو مرکزونو د جوړولو او فعالولو طرحه د ریاست الوزراء قدرمن مقام ته واړاندې شوې وه . په دغه هوکړه ليک کې د سندونو د صادرولو په پړاوونو کې د دولتي ادارو او خصوصي سکتور ټول مسووليتونه مشخص شوي او له مخې يې په کندهار، هرات، پکتیا، بلخ، کندز او نیمروز د ګمرک په ودانۍ کې د شپږو مرکزونو جوړول شامل دي. چې په اړوند ولایتونو کې باید د نړیوالو معیارونو سره سم جوړ شي، په کابل او ننګرهار ولایتونو کې د صادراتو د اسنادو د صادرولو په پړاوونو واحد مرکزونه وار د مخه په عملي توګه فعالیت ترسره کوي.
