د هېواد د فاضلانو او حافظانو د دستار بندۍ په غونډه کې د صنعت او سوداګرۍ وزارت د سرپرست ګډون
دوشنبه ۷ جمادی الثانی ۱۴۴۶ / ۱۹ قوس ۱۴۰۳
د صنعت او سوداګرۍ وزارت سرپرست محترم الحاج نورالدین عزیزي په هېواد کې له دیني عالمانو، د قران کریم له قاریانو او دیني مدرسو څخه د ملاتړ په موخه په کابل کې د حاجي چمن دارالعلوم د دستاربندۍ په اتلسمه غونډه کې ګډون وکړ.
پدې غونډه کې د حاجي چمن دارالعلوم مسوولینو د جهاد په دوران کې او له هغه وروسته له علمي مرکزونو او دیني مدرسو څخه د عزیزي کورنۍ د ملاتړ په یادونې سره د دغه نیک کار له امله د صنعت او سوداګرۍ وزارت له سرپرست محترم الحاج نورالدین عزیزي او دده له کورنۍ څخه مننه وکړه.
د حاجي چمن د عالي اسلامي دارالعلوم څخه د فراغت په اتلسمه دوره کې ۴۹ تنه فاضل او ۲۷ تنه حافظانو د فضیلت پګړۍ پر سر کړې.
د حاجي چمن عالي اسلامي دارالعلوم په ۱۳۸۱ لمریز کال کې د مرحوم حاجي چمن خان له خوا تاسیس شو، په ۱۳۸۶ لمریز کال کې د پوهنې وزارت سره ثبت او راجستر شو او په ۱۳۸۸ لمریز کال کې یې د دارالعلوم درجې ته ارتقا وکړه.
