په هرات ولایت کې صنعتکارانو ته د صنعتي ځمکو رسمي سندونه ووېشل شول
پنجشنبه 7 محرم الحرام 1447 / 12 چنګاښ 1404
ترڅنګ یې د هرات صنعتي پارک اړوند پنځم فاز افتتاح او د سرک د هموارکارۍ پروژه د هرات د ټولګټو رياست سره قرارداد او عملا کار پرې پيل شو.
د صنعت او سوداګرۍ وزارت معین، ښاغلی مولوي احمدالله زاهد، د هرات ولایت د سفر په ترڅ کې د صنعتي ځمکو د وېش په ځانګړو مراسمو کې ګډون وکړ. دا مراسم د صنعت او سوداګرۍ وزارت له لورې د هېواد د اقتصادي ودې، صنعتي پراختیا، او پانګونې د جذبولو په موخه تنظیم شوي وو.
په یادو مراسمو کې، د امیرالمؤمنین حفظهالله له منظوري وروسته، د هېواد یو شمېر مخکښو صنعتکارانو ته په رسمي ډول د صنعتي ځمکو سندونه ووېشل شول، ترڅو د هېواد په صنعتي کولو، د وارداتو کمولو، او د صادراتو زیاتوالي کې عملي ګامونه پورته شي.
د غونډې په مراسمو کې د ریاستالوزراء اداري مرستیال محترم مولوي عبدالسلام حنفي، د مخابراتو او معلوماتي ټکنالوژۍ وزارت سرپرست محترم مولوي حمدالله نعماني، د مالیې وزارت مرستیال محترم احمد حاجي، د هرات والي صاحب، د صنعت او سوداګرۍ ریاست رئیس، د سوداګرۍ او صنایعو خونې مشران او یو شمېر ملي سوداګرو پراخ ګډون کړی و.
محترم مولوي احمدالله زاهد په خپلو خبرو کې ټینګار وکړ، چې صنعت د هېواد د اقتصادي ثبات، د کاري فرصتونو رامنځته کولو، او د ملي عوایدو د زیاتوالي اساسي بنسټ دی. نوموړي زیاته کړه چې اسلامي امارت د صنعتکارانو ملاتړ ته ژمن دی او د صنعتي ځمکو منظم ویش د دې ژمنتیا یوه ښکاره بېلګه ده.
هغه په خپلو خبرو کې وویل: "موږ باید افغانستان له یوه وارداتي هېواد څخه صادراتي هېواد ته بدل کړو، او دا کار یوازې د صنعت، تولید او کورنۍ پانګونې له لارې ممکن دی. د مهاجرینو او بېوزلو هېوادوالو ملاتړ زموږ ملي وجیبه ده، او پانګوالو ته ډاډ ورکول کېږي چې د پانګونې لپاره ټول شرایط برابر دي. موږ له ټولو ملي پانګوالو غوښتنه کوو چې په هېواد کې پانګونه وکړي او د ځان تر څنګ خپلو خلکو ته هم د کار زمینه برابره کړي."
د غونډې ګډونوالو له دغه ملي اقدام او د صنعتي ځمکو د عادلانه وېش له پروسې خوښي وښوده، او ژمنه یې وکړه چې د هېواد د اقتصادي پیاوړتیا لپاره به خپل ټول توان کاروي.
