د افغانستان اسلامي امارت د صنعت او سوداګرۍ وزارت معین د بنګلهدېش هېواد د درملو تولیدي فابریکو څخه لیدنه وکړه
پنجشنبه، 3 شعبان المعظم 1447 / 2 دلو 1404
د افغانستان اسلامي امارت د صنعت او سوداګرۍ وزارت معین، مولوي احمدالله زاهد، او ورسره مل پلاوي د بنګلهدېش هېواد په پلازمېنه ډاکه کې د درملو له دوو سترو او پېژندل شوو تولیدي فابریکو BEXIMCO Pharmaceuticals Ltd او RENATA PLC څخه لیدنه وکړه. یادې فابریکې د بنګلهدېش د پرمختللو تولیدي شرکتونو له ډلې څخه دي، چې خپل درمل شاوخوا ۵۰ هېوادونو ته صادروي.
په دې لیدنه کې مولوي احمدالله زاهد د بنګلهدېش د درملو صنعت کارانو ته بلنه ورکړه، تر څو په افغانستان کې د درملو د تولید په برخه کې پانګونه وکړي. نوموړي زیاته کړه چې په افغانستان کې بشپړ امنیت تأمین شوی، اسلامي امارت د صنعت او تولید ملاتړ کوي، او د پانګونې لپاره هر ډول لازمې اسانتیاوې برابرې شوې دي.
همدارنګه، د اسلامي امارت د عامې روغتیا وزارت د درملو او روغتیايي محصولاتو د تنظیم لوی رئیس، ښاغلي ډاکټر نعیمالله ایوبي، د بنګلهدېش د درملو صنعت کارانو ته د عامې روغتیا وزارت د نافذه قوانینو له مخې د هر اړخیزې همکارۍ ډاډ ورکړ.
مولوي احمدالله زاهد له یادو فابریکو څخه په داسې حال کې لیدنه وکړه چې افغان سوداګرو هم ورسره ملتیا کوله. د دې لیدنې په ترڅ کې افغان سوداګرو د بنګلهدېش د درملو له تولیدي فابریکو سره د مستقیمو قراردادونو پر لاسلیک او افغانستان ته د بنګلهدېش څخه د درملو د واردولو پر موضوع توافق وکړ.
