د افغانستان او اوکراین دنړیوال سوداګریز مرکز ترمنځ د همکارۍ هوکړه لیک لاسلیک شو
یکشنبه : دکب ۲۴ مه ۱۳۹۹
د کابل دنړیوال سوداګریز مرکز او کیف نړیوال سوداګریز مرکز ترمنځ د دهمکارۍ هوکړه لیک د افغانستان د صنعت او سوداګرۍ وزیرښاغلي نثار احمد غوریاني او د اوکراین د سوداګرۍ نړیوال مرکز لوړ پوړو چارواکو په حضورکې رسما لاسلیک شو.
دصنعت او سوداګرۍ وزیر نثار احمد غوریاني د نړۍ له ټولو هیوادونو سره د سوداګریزو اړیکود پراخولو او په افغانستان کې د پانګونې لپاره دهر راز اسانتیاوو رامینځته کولو په موخه خپل چمتو والی په ډاګه کړ.
ښاغلي غوریاني ټینګار وکړ چې د افغانستان او اوکراین ترمنځ سوداګري او ټرانزیټي اړیکې به پراخې شي.
د اوکراین د نړیوال سوداګریز مرکز چارواکو هم د دواړو هیوادونو تر منځ د سوداګرۍ او ترانزیت د تازه پړاو د پیل په اړه وویل چې دوی په دې برخه کې لا نورو همکاریو ته چمتو دي.
دیادونې وړ ده چې په دې ناسته کې د پانګه اچونې اسانتیا د برخې رییس عطاء الله نصیب ، د افغانستان د اسلامي جمهوریت د ولسمشر ۍ ماڼۍ دچارو دادارې د پالیسۍ او پلان جوړونې رییس ، میرویس میرزکوال ، د ریل ګاډي د عمومي ریاست د مالي او اداري مرستیال ، ذبیح الله زیارمل ، د کابل نړیوال سوداګریز مرکز رییس او نور و غړو ګډون کړی وو.
داپه داسې حال کې ده چې د صنعت او سوداګرۍ وزیر نثار احمد غوریاني په مشرۍ د افغانستان د اسلامي جمهوریت لوړ پوړي پلاوي د سوداګرۍ او اقتصادي همکاریو په برخه کې د ګډ کمیسیون په دوهمه ناسته کې ، دغه هېواد ته رسمي سفر کړی دی.
د یادونې وړ ده چې په دغه هوکړه لیک کې د دواړو هیوادونو تر منځ په سوداګریزو همکاریو ټینګار شوی دی.
