د خاص اقتصادي زون د جوړولو لپاره په بلخ ولایت کې د دوه زره جریبه ځمکې تثبیت
یکشنبه ۲۲ جمادی الاول ۱۴۴۶ / ۴ لینډی ۱۴۰۳
د ا.ا.ا. د صنعت او سوداګرۍ وزارت سرپرست محترم الحاج نورالدین عزیزي او ورسره مل پلاوي بلخ ولایت ته د خپل سفر په دوام، پداسې حال کې چې د یاد ولایت د والي مرستیال محترم مولوي نورالهادی ابوادریس ورسره ملګری و، حیرتان بندر ته نژدې د خاص اقتصادي زون د جوړښت په موخه دوه زره جریبه ځمکه تثبیت کړه.
د خاصو اقتصادي زونونونو جوړونه، د صنعت او سوداګرۍ وزارت د مشرتابه له ابتکاراتو څخه دي چې د لومړي ځل لپاره په هېواد کې د لا زیاتې پانګونې د جلب په موخه، د دغه زونونو جوړیدل په افغانستان کې د یاد وزارت له خوا د اسلامي امارت کابینې ته پیشنهاد شول.
همدارنګه د صنعت او سوداګرۍ وزارت تر وړاندیز وروسته، دغه وزارت د بېرته راګرځیدونکو پانګوالو، سوداګرو او صنعت کارانو ته د آسانتیاوو د تنظیم کمیټې د طرز العمل په اوولسمه ماده کې مکلف شوی ترڅو په بندرونو یا فرضي کرښه کې د صنعتي فابریکو د فعالیت لپاره صنعتي ساحې جوړې کړې چې صنعت وده وکړي او سوداګر او صنعت کاران نور هم وهڅول شي.
