د سوداګریزې اسانتیا د تړون او د نړیوال سوداګریز سازمان د بین المللي کمیټې اوومه عالي رتبه غونډه تر سره شوه
دغه غونډه نن د صنعت او سوداګرۍ وزارت د سرپرست او په مالي او بانکي چارو کې د ریئس جمهور ستر سلاکار ښاغلي اجمل احمدي تر مشرۍ لاندې د دولتي او خصوصي سکتور د استازو په ګډون د دې وزارت د غونډو په تالار کې تر سره شوه.
پدې غونډه کې نړیوال سوداګریز سازمان ته د افغانستان د ژمنو د مهال ویش پلي کولو په عمومي راپور، د نباتي او حیواني حفظ الصحې د تړون پلي کولو، د سوداګریزو اسانتیاوو پورتال، طرزالعملونه، مقررو او تصمیم نیولو په اړه بحث او خبرې وشوې.
ښاغلي اجمل احمدي نړیوال سوداګریز سازمان ته د افغانستان د ژمنو د عملي کولو په اړه په ټینګار وویل؛ خوښ یم، چې زمونږ یوه اندازه ژمنې نړیوال سوداګریز سازمان بشپړې کړې او د وروستي کیدو لپاره یې نورې هڅې هم روانې دي.
همدارنګه نوموړي وویل: هغه وزارتونه چې ژمنې یې وروستۍ کړې نه دي؛ د پلي کولو په برخه کې باید له مونږ مرسته وغواړي تر څو د سوداګرۍ په سکتور کې د اصلاحاتو پروسه په بریالیتوب پلې کړي.
