د صنعت او سوداګرۍ وزارت د ۸۲ ميلیونو افغانیو په ارزښت د امیر علي شیر نوایي د دویم فاز په صنعتي پارک کې پانګونه کوي
22/4/1399
د یکشنبې په ورځ د بلخ ولایت د سوداګرۍ خونې مديره پلاوي ښاغلي آرش یونسي او د دې ولایت د معدن او صنایع خونې ریس ښاغلي ياسین اکبري د سوداګرۍ خونو، خصوصي سکتور، صنعت او سوداګرۍ وزارت د ګډو همکاريو په موخه دصنعت او سوداګرۍ وزارت له سر پرست معين ښاغلي عبدالکریم ملکيار سره وکتل په دغه کتنه کې ددواړو خونو درهبرۍ پلاوي دخصوصي سکتور صنعت او سوداګرۍ وزارت تر منځ له ګډې همکارۍ څخه خوښي څرګنده کړه او تر څنګ يې په دغه ولايت کې دصنعت او سوداګرۍ پر وضعيت، د کسبګرو پر فعالیتونو او د خصوصي سکتور پر ستونزو خبرې وکړې او دلاډيرو همکاريو غوښتونکي شول.
ښاغلي ملکيار دغه پلاوي ته دښه راغلاست ترڅنګ په ډاګه کړه چې دصنعت او سوداګرۍ وزارت په هېواد کې د اقتصادي ودې سترې موخې ته درسېدو لپاره غوره وسيله ده او په ټول توان دخصوصي سکتور د قانوني کړنو ملاتړ کوي.
نوموړي په بلخ ولایت کې د صنعتي پارکونو په اړه وويل چې دغه وزارت به په نږدې راتلونکي کې په بنسټیزو برخو کې دبلخ ولايت په امير علي شير نوايي صنعتي پارک کې 82 ميليونه افغانۍ پانګونه وکړي.
