د صنعت او سوداګرۍ وزارت سرپرست ترکیې ته په سفر لاړ
سه شنبه ۲۴ جمادی الاول ۱۴۴۶ / ۶ لینډی ۱۴۰۳
د ا.ا.ا.د صنعت او سوداګرۍ وزارت سرپرست محترم الحاج نورالدین عزیزي نن سه شنبه د ۱۴۰۳ لمریز کال د لیندۍ(قوس) په ۶مه نېټه له مل پلاوي سره د (استانبول حلال ۲۰۲۴ )نندارتون په پرانیست غونډه کې د ګډون په موخه د ترکیې جمهوریت ته په سفر ولاړ.
دغه نړیوال نندارتون به د ۲۰۲۴زېږدیز کال د نوامبر له ۲۷مې تر دېرشمې ( د ۱۴۰۳ لمریز کال د لیندۍ له ۶ مې تر ۹ مې) د ترکیې په استانبول ښار کې جوړ شي او ټاکل شوې ده چې د ا.ا.ا د صنعت او سوداګرۍ وزیر ددې نندارتون په پرانیست غونډه کې وینا او د نندارتون په اړونده نورو پروګرامونو کې هم ګډون وکړي.
د یادونې وړ ده چې پدې نندارتون کې به د افغانستان د خصوصي سکتور تر ۳۰ تنو زیات استازي د افغانستان د اسلامي امارت د صنعت او سوداګرۍ وزارت د محترم سرپرست ملتیا وکړي او د افغانستان محصولات او تولیدات به د غالیو،قیمتي او نیمه قیمتي ډبرو، وچو میوو او بانکدارۍ په سکتورونو کې په اتو بېلو بېلو غرفو کې نندارې ته وړاندې کړي.
د ا.ا.ا.د صنعت او سوداګرۍ وزارت سرپرست محترم الحاج نورالدین عزیزي د ترکیې هېواد ته تر خپل سفر وړاندې د خپل دغه سفر او د هغه ځای د پروګرامونو په اړه د هېواد رسنیو ته معلومات ورکړل.
