د هېواد د صنعت کارانو ستونزې واوریدل شوې
دوشنبه ۲۳ جمادی الاول ۱۴۴۶ / ۵ لینډی ۱۴۰۳
د صنعت او سوداګرۍ وزارت معین محترم مولوی احمدالله زاهد، نن دوشنبه د ۱۴۰۳ لمریز کال د لیندۍ (قوس) په پنځمه د افغانستان د صنایعو او معادنو خونې له مرستیال محترم سخیاحمد پیمان، د هرات د صنایعو او معادنو خونې رییس محترم حمدالله خادم او د هېواد له یو شمیر صنعت کارانو سره ولیدل.
پدې لیدنه کې د هېواد صنعت کارانو خپلې ستونزې او هغه ننګونې چې د دوی د صنعتي فعالیتونو پر لاره پرتې دي، د صنعت او سوداګرۍ وزارت له معین سره شریکې کړې او له صنعتي فابریکو څخه د لا زیات ملاتړ غوښتونکي شول.
د صنعت او سوداګرۍ وزارت معین محترم مولوی احمدالله زاهد، دوی ته د ښه راغلاست په ویلو د هغوی ستونزې او ننګونې واوریدې او پر دې ټکي یې به ټینګار سره چې پدې وزارت کې دوی د هېواد د خصوصي سکتور په خدمت کې دي، څرګنده کړه چې د صنعتي ساحو د قانون تر لاسلیک او په رسمي جریده کې د هغې تر نشر وروسته اوس د صنعتي ساحو پر طرزالعمل کار روان دی.
د صنعت او سوداګرۍ وزارت معین زیاته کړه چې د سوداګریزو نښو د ثبت په تړاو ستونزو ته رسیدنه کېږي او پدې برخه کې د لا زیاتو آسانتیاوو د راوستلو په موخه لا هم هڅې روانې دي.
محترم مولوي زاهد همدارنګه په صراحت سره وویل چې د صنعت او سوداګرۍ وزارت مشرتابه د خصوصي سکتور د استازو په توګه د تعرفې په کمیټه کې د دوی له فعالیتونو او اړتیاوو څخه هر اړخیزه ملاتړ کړی او کوي به یې.
