سعودي عربستان ته د حاجیانو د لیږد لپاره د کورنیو الوتنو چمتووالی
دوشنبه د سلواغې ۲۷مه ۱۳۹۹
دسعودي عربستان ته د حاجیانو د لیږد د پروسې د څیړنو په هکله غونډه د صنعت او سوداګرۍ وزیر ښاغلي نثاراحمد غوریانې په مشرۍ، د حج او اوقافو وزارت ، د افغانستان د آریانا افغان او کام ایر هوايې شرکتون او خصوصي سکتور د استازو په ګډون د دې وزارت د کنفرانسونو په تالار کې ترسره شوه.
په دې ناسته کې، د افغانستان دآریانا افغان او کام ایر هوايې شرکتونو سعودي عربستان ته د حاجیانو په لیږدولو کې خپل چمتووالی اعلان کړ ، او ویې ویل چې دوی په راتلونکي لمریز کال کې سعودي عربستان ته د حاجیانو د لیږدولو لپاره بشپړ چمتو والی لری.
د صنعت او سوداګرۍ وزیرښاغلی نثار احمد غوریاني وویل چې د دې غونډې هدف سعودي عربستان ته د حاجیانو د لیږد په پروسه کې د کورنیو شرکتونو د امکاناتو څیړنه او د حکومت لخوا د هغوي مالي ملاتړ دی.
همدا راز د حج او اوقافو وزیر محمد قاسم حلیمي ټینګار وکړ چې د حاجیانو د لیږد پروسې قرارداد به د وزارت د شرط نامې سره سم کورنیو دولتي او خصوصي هوایی شرکتونو ته ورکړل شي.
ښاغلي حلیمي زیاته کړه که چیرې کورني هوايي شرکتونه سعودي عربستان ته د حاجیانو د لیږدونې امکانات نه درلودل نو، وزارت به د حاجیانو د لیږد لپاره له بهرنیو شرکتونو سره تړون لاسلیک کړي.
د افغانستان د اسلامي جمهوري دولت ولسمشر ډاکټر محمد اشرف غني د لاښوونې په اساس ، د صنعت او سوداګرۍ وزارت او د حج او اوقافو وزارت د خصوصي شرکتونو له استازو سره په همغږۍ سعودي عربستان ته د حاجیانو د لیږد پروسې د غونډو مشري په غاړه لری.
