په افغانستان کې پانګونې ته د ترکي پانګوالو لیوالتیا
سه شنبه۱۵ جمادی الثانی ۱۴۴۶ / ۲۷ لینډی ۱۴۰۳
د افغانستان د اسلامي امارت د صنعت او سوداګرۍ وزارت معین محترم مولوي احمدالله زاهد نن د خپل کار په دفتر کې له یو شمېر ترکي پانګوالو سره وکتل.
پدې کتنه کې ترکي پانګوالو د افغانستان د کرهنې له سکتور، خاصو ساختماني موادو د تولید او ترکیې ته له افغانستان څخه د ممیزو د صادرولو په برخه کې خپله لیوالتیا وښوده او د پانګونې په برخه کې یې د افغانستان د اړتیاوو په تړاو معلومات وغوښتل.
د صنعت او سوداګرۍ وزارت معین محترم مولوي احمدالله زاهد په افغانستان کې له پانګونې سره د دوی له لیوالتیا خوښي وښوده او څرګنده یې کړه چې د صنعت او سوداګرۍ وزارت د پانګوالو لپاره د آسانتیاوو رامینځ ته کولو او د لا زیاتو پانګونو د جلب او جذب په موخه یو ځانګړۍ ریاست جوړ کړی چې بهرني پانګوال کولای شي په آن لاین بڼه ویزه او معلومات ترلاسه کړي.
همدا رنګه محترم مولوي زاهد د دوی د خبرو په اوریدو سره د پانګونې په برخه کې د افغانستان اوسنی اړتیاوې د دوی د فعالیتونو د اړونده سکتورونو مطابق ورته بیان کړې او د افغانستان د صنعتي ساحو د قانون له مخې یې پانګوالو ته د ځمکو د وېش په تړاو یې هم ددې وزارت تیاري څرګنده کړ.
