په مزار شریف ښار کې دننګرهار او بلخ ولایتونو دصنعت کارانو ګډه غونډه
یکشنبه : دوري ۱۵مه ۱۴۰۰
د ننګرهار او بلخ ولایتونو دصنعت کارانو او سوداګرو ګډه ناسته چې د واليانو د مرستیالانو ، د صنعت او سوداګرۍ د ریاستونو چارواکو او ښځینه متشبثینو په شتون کې د صنعت او سوداګرۍ په برخه کې د لا همکارۍ ، دخصوصي سکتور او صنعت کارانو او سوداګرو د ستونزو د حل په موخه جوړه شوې وه.
په دې ناسته کې د ننګرهار او بلخ ولایتونود صنعت او سوداګرۍ ریاست چارواکو د دې دوو ولایتونو د صنعتکارانو او سوداګرو تر منځ د صنعتي او سوداګریزو تجربو شریکولو پر دوام او همکاریو ټینګار وکړ او زیاته یې کړه چې د دواړو ولایتونو خصوصي سکتور کولی شي د صنعتي فرصتونو او ننګونو په برخه کې له یو بل سره همکاري وکړي.
همدا راز د ننګرهار ولایت د سوداګرۍ او صنایعو رییس ، محمد حسن محسن وویل چې د همکاریو دوام او د سوداګرۍ په برخه کې د تجربو شریکولو سره به په هیواد کې اقتصادي ودې او کورني تولید ته لاره هواره شي او یو شمیر خلکو ته به د کار زمینه هم برابره شي، نوموړي د حیرتانو او تورخم بندرونو پر اهمیت هم ټینګار وکړ او پر چارواکو یې غږ وکړ چې د هیواد په بندرونو کې صادراتو او وارداتو ساده کولو ته لا ډیر پام وکړي.
دغه ناسته په داسې حال کې ترسره کیږي چې په مزار شریف ښار کې د درې ورځو لپاره یو ګډ نندارتون دخواهر شهري برنامې له لارې د ننګرهار او بلخ ولایتونو ترمینځ په لاره اچول شوی و.
دصنعت او سوداګرۍ وزارت تل هڅه کړې چې صنعتکارانو او سوداګرو ته د پالیسۍ جوړوونکې ادارې په توګه لا ډیرې اسانتیاوې برابرې کړي ترڅو په هیواد کې پانګونه راجلب کړي.
