په هرات ولایت کې د رنګ جوړولو ۸۰ ډوله تولیدات
چهارشنبه: د چنګاښ ۲مه ۱۴۰۰
په هرات ولایت کې د رنګ فابریکه چې د یو میلیون امریکایی ډالرو په لومړني پانګونې سره فعالیت کوي،دا مهال له ۸۰ ډوله څخه زیات رنګونه تولیدوي او خپل محصولات د افغان فیضي برانډ لاندې د هیواد په بازارونو کې پلوري.
د افغان فیضي د رنګ فابریکه چې په۱۳۸۲ لمریز کال څخه د هرات صنعتي ښارګوټې کې فعالیت کوي ددغه ولایت له ۱۵۰ څخه زیاتو اوسیدونکو ته يې د کار زمینه برابره کړې ده ،چې په یو شپه او ورځ کې د ۵۰ ټنه رنګ ( ۱۰ زره ) ډبیو رنګ د تولید وړتیا لری.
د دې فابریکې مسؤلین وايي چې دا مهال دوی په دې فابریکه کې د رنګونو ۸۰ډوله تولیدات لری او د اړتیا وړ اومه مواد د هیواد دننه ترلاسه کوي،چې په ۸ ولایاتو کې رسمي نمایندګۍ لري او خپل محصولات د هیواد ټولو ولایتونوته د پلور لپاره وړاندې کوي.
د صنعت او سوداګرۍ وزارت د هیواد د اقتصادي ودې او کورنیو تولیداتو څخه د ګټې اخسیتې په موخه دخصوصي سکتور او صنعت کارانو پراخه ملاتړ کوي.
