په پل چرخي صنعتي پارک کې د ماشومانود ډايپرونوصنعتي شرکت څخه دصنعت او سوداګرۍ وزير ليدنه
چهار شنبه دغوايي۲۹ مه ۱۴۰۰
د صنعت او سوداګرۍ وزیر ښاغلي نثار احمد غوریاني د پل چرخي په صنعتي پارک کې د ماشومانود ډايپرونو د بيلابيل ډولونو تولید کونکي صنعتي شرکت څخه لیدنه وکړه او ددې شرکت له چارواکو سره یې ددوی په وړاندې پرننګونو او فرصتونو بحث وکړ.
ښاغلي غورياني ددې ليدنې په بهيرکې ، د افغانستان د صنایعو او کانونو عمومی رییس او د خصوصي سکتور استازو هم ملګرتيا کوله.
د صنعت او سوداګرۍ وزیر نثار احمد غوریاني وویل چې د هیواد په صنعتي پارکونو کې د تولیدي فابریکو څخه دليدنې موخه د صنعت کارانو فرصتونه او ننګونې او د افغاني صنعت د تولید ظرفیت ترلاسه کول او د صنعتکارانو ستونزې حلول دي.
ښاغلي غوریاني د کورنیو تولیداتو په کارولو ټینګار وکړاو زياته يی کړه جې د صنعت او سوداګرۍ وزارت د صنعتکارانو او دولتي ادارو په همکارۍ به د کورنیو تولیداتو د ورته محصولاتو تعرفې د کورنیو تولیداتو د ملاتړ په خاطر لوړې کړي.
دلوګر صنعتي شرکت ، په کال ۲۰۱۶ کې په دې برخه کې خپل فعالیتونه پیل کړل او اوس خپل محصولات د هیواد په بیلابیلو برخو کې پلوري.
دا صنعتي شرکت ، له اروپایی هیوادونو او چین څخه د اړتیا وړ خام توکي ترلاسه کوي او د هیواد 50 تنو اتباعو لپاره يې د کار کولو فرصتونه رامینځته کړي.
