په ډاکه کې د افغانستان او بنګلهدېش ترمنځ د سوداګریزو اړیکو د پراختیا لپاره ناسته
جمعه، 4 شعبان المعظم 1447 / 3 دلو 1404
تیره ورځ د بنګلهدیش هیواد په پلازمینه ډاکه کې د افغانستان اسلامي امارت د صنعت او سوداګرۍ وزارت مرستیال او ورسره مل رسمي پلاوي او یو شمیر افغان سوداګرو د بنګلهدېش هیواد د سوداګریزې ټولنې سره صمیمانه مجلس وکړ.
په دې مجلس کې د دواړو هېوادونو د سوداګرو ترمنځ B2B ناستې او مستقیمې سوداګریزې خبرې ترسره شوې او د سوداګرۍ په پراختیا، ګډې پانګونې، بازارموندنې او اوږد مهاله همکاریو پر فرصتونو بحث وشو.
ښاغلي زاهد د بنګلهدېش حکومت او سوداګریزې ټولنې له تود هرکلي او مېلمهپالنې مننه وکړه او افغانستان یې د سوداګرۍ او پانګونې لپاره یو باوري او پرانیستی بازار وباله. نوموړي د دواړو هېوادونو ترمنځ د سوداګریزو اړیکو د لا پراختیا، د سوداګریزو پلاوو د تګ راتګ او د خصوصي سکتور د مستقیم تعامل پر ارزښت ټینګار وکړ.
دا ناسته د افغانستان او بنګلهدېش ترمنځ د اقتصادي همکاریو د پیاوړتیا او عملي مشارکتونو پر لور یو مهم ګام بلل کېږي.
