په کابل کې د صادراتو د پروسس زون د جوړولو لپاره د ۱۰۰ جریبه ځمکې د انتقال عملي چارو پیل
سه شنبه مورخ ۱۴ جمادل الاول ۱۴۴۵ / ۷ لیندی ۱۴۰۲
په افغانستان کې د صادراتې زونونو د رامنځته کولول په موخه د صنعت او سوداګرۍ وزارت په وړاندیز او د عالیقدر امیرالمؤمنین حفظه الله د فرمان پر اساس د صادراتو د پروسس زون د جوړولو په موخه د فواید عامې وزارت څخه صنعت او سوداګرۍ وزارت ته د ۱۰۰ جریبه ځمکې د انتقال په اړه د اړوندو ادارو ترمنځ ګډه ناسته ترسره شوه.
د همغږۍ په دې غونډه کې چې د چارو ادارې عمومي ریاست کې جوړه شوې وه، د صنعت او سوداګرۍ، فواید عامې، کرنې، اوبولګولو او مالدارۍ، کور او ښار جوړونې او ماليې وزارتونو او د کابل ښاروالۍ استازو ګډون کړی و، ګډونوالو د موضوع په اړه خپل نظریات شریک کړل.
د صنعت او سوداګرۍ وزارت د صادراتو د چارو رئیس ښاغلي احسان الله فطرت وویل، د دغه زون جوړول د اقتصادي پرمختګ لپاره یو مهم ګام دی، نوموړي زیاته کړه : د صادراتو د پروسس زون؛ د سوداګریزو توکو معیاري بسته بندي، پروسس او په معیاری توګه د توکو د انتقال لپاره زمینه برابروی .
نوموړي وویل، د دغه زون د نه شتون له امله؛ افغانستان هر کال شاوخوا څلور ملیارده ډالره زیان سره مخ کیږی .
د صنعت او سوداګرۍ وزارت د صادراتو او سوداګرۍ په برخه کې د ملي معیارونو د اړتیا په پام کې نیولو او په دې پروسه کې د اسانتیاوو برابرولو، د معیاري بسته بندۍ، د کورنیو تولیداتو د معیاري کولو، د کارموندنې د رامنځته کولو او د هېواد د صادراتو د ودې او پراختیا په موخه د صادراتو د پروسس د زونونو د جوړولو طرح د هېواد په ۶ ولایتونو کې د هر زون لپاره ۱۰۰ جریبه ځمکې په نظر کې نیولو سره ترتیب او د مشرتابه قدرمن مقام ته واستول شوه چې د قدرمن مشرتابه لخوا تائید شوه .
په پام کې ده چې دغه زونونه په کابل، کندهار، هرات، ننګرهار، بلخ او پکتیا ولایتونو کې جوړ شي، په هر زون کې به ۲۰ زره تنو ته د کار زمینه برابره شي، چې د کابل ولایت د صادراتو د پروسس زون د ځمکې د انتقال چارې پیل شوې او په نورو زونونو کې هم د ځمکې د انتقال لپاره کارونه جریان لری.
د دې ناستې په پای کې د يادو ادارو استازو د صنعت او سوداګرۍ وزارت ته انتقال کیدونکې ځمکې ساحه له نږدې وکتله او ژمنه يې وکړه، چې د صادراتو د پروسس د زون په جوړولو کې به پوره همکاري کوي.
